Esquerda Unida Lugo: “O Pleno de organización demostrou que desapareceu a ética de esquerdas no Concello de Lugo”

O aumento de asesorías e dedicacións exclusivas costará ás arcas municipais un total de 1.113.000 euros ao ano no vindeiro mandato. Un aumento de 227.000 euros ao ano a pesar de contar neste mandato con dos grupos municipais menos que no anterior. PSOE e BNG acordaron que existan 14 dedicacións exclusivas, con un salario bruto anual para cada edil de 44.408 euros, e un salario para a alcaldesa de 67.018 euros en 14 pagas. O PSOE terá aos seus oito concelleiros/as con dedicación exclusiva, ademais de contar con nove asesores/as como persoal de confianza. Os/as concelleiros/as do BNG contarán todos/as con dedicación exclusiva, e terán cinco asesores/as.

En Esquerda Unida consideramos unha clara involución política que o novo goberno municipal, supostamente progresista, adopte como primeira medida a subida do gasto en dedicacións exclusivas dos concelleiros e concelleiras do PSOE e BNG e no número de asesorías, un feito que fai retroceder a institución a mandatos anteriores e serve de indicador da orientación que van ter as políticas “progresistas” do goberno municipal no mandato que agora comenza.

De feito, todos os concelleiros socialistas e nacionalistas van disfrutar de dedicación exclusiva, ademais de catorce asesorías, unha cifra que supera o seu propio número de edís. PSOE e BNG aluden á suposta eficacia para tentar xustificalo, pese a que a eficacia é un principio que non garda relación directa algunha con manter dedicacións exclusivas e asesorías, senón que dependerá da capacidade de xestión que amosen os concelleiros/as delegados/as para desempeñar a súa función.

O PSOE mantén os nove do mandato anterior cando aludía en 2015 que eran necesarios para poder exercer o seu goberno en solitario.

O municipio de Lugo segue padecer os efectos da crise económica, e conta actualmente con 15.000 persoas en risco de exclusión social. Os impostos dos/as lucenses, incluídos os das persoas máis desfavorecidas, son utilizados polo PSOE e o BNG para crear axencias de colocación dos seus respectivos partidos políticos no Concello, aos que haberá que sumar os que crearán na Deputación.

PSOE e BNG se comportan como Sociedades Anónimas, primando os seus intereses particulares fronte á vocación pública.

De feito, a última partida orzamentaria destinada polo goberno municipal a exclusión social era de 250.000 euros, a cuarta parte do que cobrarán os actuais membros da corporación con dedicacións.

Buscando xustificar o inxustificable, PSOE e BNG falan de conxelación das asignacións. Pero é preciso sinalar que a alcaldesa continuará cobrando 4.787,22 euros en catorce mensualidades e o resto de concelleiros/as con dedicacións exclusivas percibirá 3172,40 euros, na provincia cos salarios e as pensións máis baixas do Estado. Se a alcaldesa finaliza os oito anos de mandato, por exemplo, embolsará a cifra de 536.168,64 euros. Se ademais de aumentar o número de dedicacións e asesorías aumentasen os seus salarios e non os conxelasen, sería unha obscenidade difícil de transmitir socialmente, merecedora mesmo dunha mobilización.

Comparte:

Deja un comentario

Tu dirección de correo electrónico no será publicada. Los campos obligatorios están marcados con *

seis + quince =

Este sitio usa Akismet para reducir el spam. Aprende cómo se procesan los datos de tus comentarios.