Asinado o contrato para a execución do proxecto da nova grada e a ampliación dos vestiarios do campo de fútbol das Eiroas de Carballo

Representantes da empresa adxudicataria, do Concello e do Bergantiños FC mantiveron unha primeira xuntanza previa ao inicio das obras                                

O alcalde, Evencio Ferrero, asinou hoxe o contrato coa empresa Covisam Norte para a execución do proxecto de mellora do campo de fútbol das Eiroas. A construtora, con sede en Carballo, iniciará en breve as obras, e por iso tras o acto formal da sinatura xa mantivo unha primeira xuntanza de traballo con representantes do Concello de Carballo e do Bergantiños Fútbol Club, principal usuario da instalación municipal.

O proxecto foi adxudicado por 453.725,80 euros. A empresa Covisam Norte disporá de seis meses para a execución das obras, que consisten, por unha banda, na mellora do acceso á instalación deportiva mediante a urbanización exterior. Tamén se ampliarán os vestiarios do campo principal, que despois de vinte anos non se adaptan ás necesidades actuais dun dos clubs galegos con máis licenzas federativas: 510 nestes momentos.

Pero a principal actuación será a construción dunha nova grada con capacidade para 300 espectadores/as. A obra, froito do consenso entre a Concellería de Deporte e o Bergantiños FC, permitirá mellorar a comodidade e a seguridade do público cunha grada nova que se situará no fondo norte, e que evitará ter que instalar gradas supletorias para determinados eventos, como ten ocorrido en varias ocasións nos últimos tempos.

Deja un comentario

Tu dirección de correo electrónico no será publicada. Los campos obligatorios están marcados con *

19 − doce =

Este sitio usa Akismet para reducir el spam. Aprende cómo se procesan los datos de tus comentarios.