Intercambio interuniversitario da UDC coa Universidade de Granada

O presidente do Consello Social, Antonio Abril, recibiu aos tres estudantes do diploma en “Formación en Inclusión Social e Laboral de Xente Nova con Discapacidade Intelectual” da Universidad de Granada, que, acompañados por unha das súas docentes, participan esta semana no primeiro intercambio interuniversitario dos programas de formación sociolaboral para persoas con discapacidade cognitiva, que forman parte da rede UniDiversidad. As actividades en que participan combinan as clases na aula, con formación en habilidades para o emprego, xunto con visitas culturais e propostas de ocio, en completa inclusión con outros estudantes da UDC.

Tres estudantes do programa “Espazo Compartido”, xunto con dous docentes do título propio da Universidade da Coruña, estiveron a semana pasada de intercambio na Universidad de Granada, para participar nas clases do diploma correspondente na UGR. Os resultados, segundo explica a coordinadora do título coruñés, Thais Pousada, “superan todas as expectativas, xa que non só están compartindo coñecementos e aprendizaxes durante as clases, senón que tamén están fomentando as relacións sociais, o intercambio cultural e a experiencia vital que marcará a formación en competencias profesionais destes alumnos e alumnas”.

No acto de recepción protagonizado polo Consello Social da UDC, estiveron presentes a vicerreitora do Campus de Ferrol e Responsabilidade Social, María Jesús Movilla, ademais da coordinadora Thais Pousada, e o xerente da Fundación UDC, Juan José Gómez.

Espazo Compartido é un curso de formación específica de posgrao da Universidade da Coruña de formación en habilidades persoais, sociais e competencias básicas para a empregabilidade e a inclusión laboral de persoas novas con discapacidade cognitiva. Trátase dun proxecto pioneiro no sistema universitario de Galicia e un dos primeiros no ámbito nacional, que forma parte da rede UniDiversidad. Este bienio 2019/2021 acolle á que será a IV promoción do título. Espazo Compartido conta co apoio do Consello Social da Universidade da Coruña, a Fundación ONCE, o Grupo Banco Santander e Fundación Universia.

II Olimpíada de Enxeñaría de Camiños, Canais e Portos con máis dun centenar de estudantes de Secundaria

A Escola Técnica Superior de Enxeñaría de Camiños, Canais e Portos da Universidade da Coruña, acolleu onte a II Olimpíada de Enxeñaría de Camiños, Canais e Portos para o alumnado de primeiro e segundo cursos de Secundaria.

Participaron 24 equipos, cun total de 120 estudantes, de 17 centros diferentes. A maioría procedían da provincia da Coruña (Betanzos, Narón, Ferrol, Oleiros, Pontedeume e A Coruña) pero tamén acudiron estudantes de Marín e Pontevedra. Os participantes tiveron que realizar seis probas baseadas en diferentes ámbitos da enxeñaría civil: pontes, loxística, presas, cálculo de estruturas, construción e representación gráfica.

Ao seu remate, quedou en primeiro lugar o equipo Delasot@s do CPS Sagrado Corazón de Jesús, de Pontevedra. En segundo lugar, clasificouse o equipo Bucky-Fuller, deste mesmo centro. En terceiro lugar, o equipo Tecnotrasanqueses, do IES Terra de Trasancos, de Narón.

Os gañadores representarán á Escola de Enxeñaría de Camiños da UDC na fase nacional en Ciudad Real, onde competirán coas escolas de Granada, Ciudad Real, Valencia, Cartagena, Alicante e Burgos.

Ao acto de entrega de premios, asistiu o reitor, Julio Abalde, a conselleira de Educación, Universidade e Formación Profesional, Carmen Pomar, o director da Escola, Ignasi Colominas, o presidente da Fundación da Enxeñaría Civil de Galicia, Juan Loureda e a voceira do Colexio de Enxeñeiros de Camiños, Canais e Portos de Galicia, Lorena Solana, así como o subdirector da Escola e organizador principal do evento, José París.

Ao remate da Olimpíada, todo o alumnado participante e os seus acompañantes puideron coñecer as instalacións do Centro de Investigación Tecnolóxica en Edificación e Enxeñaría Civil, CITEEC.

A Olimpíada contou coa colaboración do Colexio de Enxeñeiros de Camiños, Canais e Portos, a Fundación da Enxeñaría Civil de Galicia, a Agrupación Estratéxica A-CITEEC, a UDC e a Xunta.

 

A App da Real Academia Galega recupera 4.000 microtopónimos en dous meses

Galicia Nomeada, a aplicación posta en marcha pola Real Academia Galega e a Xunta de Galicia para a recolleita colaborativa da microtoponimia, recibiu dende a súa posta en marcha o pasado 20 de decembro máis de 600 solicitudes de persoas interesadas en rexistrar e xeorreferenciar nomes do territorio da súa contorna. En menos de dous meses, os usuarios e usuarias dados de alta introduciron na plataforma máis de 4.000 topónimos de montes, leiras, fontes e mesmo penedos ou rochas da costa en 140 dos 313 concellos galegos, un traballo colectivo de gran valor que amosa a boa recepción cidadá que está a merecer a plataforma.

Alén de compartir os nomes da terra e identificalos sobre a imaxe aérea do territorio galego dispoñible na plataforma, boa parte dos usuarios e usuarias achegaron audios coa súa pronuncia ou con lendas asociadas, e numerosas fotos de elementos de interese cultural como cruceiros, muíños, capelas, fontes ou pontes existentes na súa zona de traballo. Unha vez validada esta información pola Real Academia Galega, calquera persoa poderá consultala entrando na ficha de cada topónimo no visor de Galicia Nomeada.

Por provincias, A Coruña é a que suma máis microtopónimos recuperados nas primeiras semanas de funcionamento da aplicación colaborativa, uns 1.500 que representan o 40 % dos 4.000 recolleitos ata o momento. Os nomes rexistrados pertencen a 47 concellos, a metade dos que hai no territorio coruñés.

En Pontevedra recolléronse a cuarta parte dos microtopónimos, algo máis de 1.000, en case a metade dos seus concellos (29 de 61); os  usuarios e usuarias de Ourense achegaron 767 novos nomes (19,5%) dende 20 dos seus 92 concellos (22%) e 553 rexistros dos máis de 4.000 realizados en apenas oito semanas (14 %) proceden da metade dos 67 concellos lugueses.

En canto ao traballo compartido polas persoas rexistradas, salientan as contribucións individuais dende Rianxo, onde a colaboradora Susana Silva achegou máis de 630 topónimos, e dende O Irixo, con máis de 509 topónimos incluídos por Xulio Dobarro. Destacan ademais achegas colectivas como os 1.025 topónimos xeorreferenciados en Silleda polo profesor Xoán Carlos García Porral mais o alumnado do IES Pintor Colmeiro.

Os máis de 4.000 microtopónimos que se incluíron no que vai de ano súmanse aos máis de 6.000 que durante a fase de probas da aplicación Galicia Nomeada achegaron colaboradores como Alberte Reboreda, que documentou 2.150 en varias parroquias dos concellos de Mondariz, Mondariz Balneario, Covelo e Cercedo Cotobade; Ana Bravo, que recompilou 635 nas parroquias de Isorna e Leiro, en Rianxo; ou Rocío Romar, que identificou medio milleiro na parroquia de Baio, no concello de Zas, e noutras parroquias do concello de Malpica.

En total, os microtopónimos rexistrados a través de Galicia Nomeada son xa 10.273, dos cales a gran maioría, uns 9.000, xa foron validados lingüisticamente polo equipo de especialistas do Seminario de Onomástica da Real Academia Galega que coordina e revisa este traballo.

Todos estes nomes da terra súmanse aos topónimos de entidades de poboación do Nomenclátor de Galicia e aos máis de 430.000 rexistrados polo Proxecto Toponimia de Galicia (2000-2011) —que se centrou na recollida da microtoponimia—, de tal maneira que a cifra de topónimos recompilados actualmente supera os 482.445. Nestes momentos xa é posible visualizar uns 291.406 topónimos sobre a imaxe aérea de Galicia e descargar a información dispoñible sobre eles (coordenadas, tipoloxía xeográfica ou fonética) tanto na aplicación Galicia Nomeada coma no visor de topónimos do Portal Toponimia de Galicia. Os microtopónimos do Proxecto Toponimia de Galicia pendentes de xeorreferenciar iranse incorporando á base de datos de Galicia Nomeada e a este visor a medida que o Instituto de Estudos do Territorio (IET) complete este labor.

1 2 3 18