En Marea propón 500 millóns máis en orzamento social

“Os orzamentos da Xunta deben atallar as emerxencias climática, feminista e social que vive Galicia”, asegura o grupo

En Marea propón a devolución dos orzamentos ao goberno ao tempo que propón emendas en todos os apartados orzamentarios e fixa a proposta de incrementar a inversión social en Galicia durante 2020 en case 500 millóns de euros sobre o orzamento de 2019. Este incremento está destinado fundamentalmente a atallar as emerxencias climáticas, feminista e social que vive o país. Unhas emerxencias que, revisados os orzamentos presentados pola Xunta, o PP quere continuar ignorando en todos e cada un dos sectores sociais e económicos de Galicia. En Marea considera, por outra parte, que facer “regalos fiscais” aos ricos mentres hai tantas necesidades que atender é unha demostración máis “da néboa que rodea a Feijóo e que non lle deixa ver a realidade de Galicia”, segundo expresou o voceiro de En Marea, Luís Villares.

En Marea considera que os orzamentos presentados pola Xunta de Galicia non atenden nin sirven para atallar ningunha das emerxencias que vive o país que, revisadas as contas presentadas polo goberno, son ignoradas ou reciben incrementos insignificantes. Nos tres casos máis significativos, os orzamentos da Xunta non demostran ningunha prioridade nas cifras. Villares considera que estes orzamentos son de “carácter claramente antisocial” e “consisten en baixadas de impostos aos ricos mentres o resto da poboación segue sen ter ben atendidas as súas necesidades en materia de sanidade, dependencia ou en planes de emprego e de desenvolvemento económico para o futuro”. Por este motivo, a proposta da formación é incrementar a inversións social en 475 millóns de euros sobre o exercicio anterior.

En Marea presenta unha emenda de totalidade para que os “orzamentos sexan verdadeiramente sociais”, con case 500 millóns de euros que atendan as tres emerxencias do país.

Vivimos unha emerxencia feminista, mais sen embargo, os fondos destinados a protección e apoio das mulleres que sofren violencia de xénero resulta ser das que menos se incrementa. Concretamente o aumento soamente é do 1,22%, por debaixo do que medra o conxunto dos orzamentos, e pasa de 14,1 millóns a 14,27 millóns. Un incremento que resulta ser insignificativo especialmente cando se ten en conta o executado no ano 2018. En dito ano o gasto comprometido foi de 14,6 millóns, mentres que o gasto executado acadou os 6,6 millóns. En Marea propón como punto de partida “un plan de superación da fenda salarial entre mulleres e homes”. A proposta de En Marea para a emerxencia feminista nos orzamentos deste ano tamén pretende poñer en marcha un plan de conciliación da gratuidade das garderías de 0 a 3 anos.

Sufrimos unha emerxencia ambiental, pero a Xunta non considera darlle a importancia que realmente ten. Baste con comprobar que cando consideramos todas aquelas partidas destinadas a actuacións contra o cambio climático o gasto destinado a combatelo non chega aos 450 millóns de euros, o 4,3% do gasto orzamentario total. As propostas de En Marea para esta emerxencia están centradas en puntos como a creación dunha empresa pública para as enerxías renovables que sirva para xestionar os embalses e parques eólicos con concesións que vaian caducando. Entres as propostas de En Marea tamén está a creación dunha empresa pública comercilizadora de enerxía para abaratar os prezos a familias e a industrias.

crise industrial que preconiza a emerxencia social dun paro insoportable, e que funciona como tarxeta de embarque da nova emigración, non resulta un problema para a Xunta do PP, que considera que os retos aos que se expón este sector son insuperables e prefire apostar polo máis sinxelo, encomendarse ao santo e agardar que o 25 de xullo caia en domingo. Causa estupor que un país no que as súas zonas máis industrializadas están en crise estrutural ou de modelo (electrointensivas), pasando por dificultades conxunturais importantes (construción naval) precisadas de captación de novos proxectos de desenvolvemento (transformación agroalimentaria, I+D+i), ou en transición (automoción eléctrica) merezan o desprezo da Xunta ata o punto de que a partida dedicada ao Desenvolvemento Empresarial cae nun 1,28%. Mentres tanto, iso si, a aposta polo turismo, que crea emprego maiormente estacional e de baixa calidade, moi sometido á conxuntura económica internacional e que ten efectos secundarios no uso especulativo das vivendas que soben os prezos do aluguer nas cidades impedindo a emancipación da xente moza -sen que a xunta actúe para neutralizalo-, e que promove o crecemento desordenado e insostible do cemento no castigado litoral de Galicia, increméntase nun 15%. Neste sentido, En Marea propón “a creación dun plan de industrialización verde que terán a Cerceda e Ferrolterra como puntos de arranque desde os que elaborar un mapa da transición sostible para Galicia”. Segundo explica o voceiro de En Marea, a intención deste plan é “evitar que o peche de empresas se convirta nunha fábrica de parados e emigrantes”. Tamén desde o punto de vista social, En Marea propón un incremento da atención á dependencia e unha ampliación dos servizos da demanda sanitaria.

Estas cifras manexadas pola Xunta de Galicia para o orzamento de 2020 sinalan que as prioridades do PP son moi diferentes das necesidades do país e por iso En Marea propón unha serie de medidas destinadas a favorecer a inversión en medioambiente, feminismo e social para atallar os males do país, desde a desigualdade á crise industrial e laboral pola que atravesa Galicia. Villares asegura que estes case 500 millóns de euros de inversión social que propón En Marea terán unha procedencia moi clara nos orzamentos, “anulando as rebaixas fiscais aos máis ricos e subindo a fiscalidade as grandes empresas que se están beneficiando do expolio dos recursos de Galicia”. Villares reclama “a aplicación dunha xustiza fiscal para un reparto máis efectivo dos recursos e que ninguén quede atrás en Galicia”.

A CIG reclama a xestión pública das cociñas nas Galiñas azuis

Desde a CIG-Administración Autonómica quere denunciar a mala calidade da alimentación e intoxicacións continuadas que se están a dar nas escolas infantís do Consorcio galego de servizos de igualdade e benestar da Xunta de Galiza. Coa nova intoxicación que se produce na Galiña azul de Carral volve a evidenciarse o risco que sofren os nosos pequenos polos servizos de catering en vez de cociñas própias.

“As cociñas con persoal propio teñen un sistema de control sanitario da Xunta, ao eliminarse a xestión publica e venderse o servizo cara empresas de catering xa non esta no programa de control sanitario e do REGASA (base de datos do rexistro sanitario galego). Elimínase  desta forma a presión inspectora a estas grandes empresas que operan nas cociñas dos centros públicos e  distribúen a comida ó longo do país buscando o máximo beneficio e xogando coa saúde dos usuarios e usuarias”, afirma.

Para a CIG ademais de que aos alimentos estén en bo estado tamén teñen que ser adecuados para a alimentación dos pequenos, así debese eliminar a presenza de graxas trans, alimentos alerxénicos, sucres e aditivos ou incluso exceso de sal. Pero os pais e nais descoñecen que materia prima que se emprega e si a Xunta esta facer cumprir a lei e as recomendacións de alimentación escolar vixentes onde se marcan limitacións a estes ingredientes.

Dende a CIG quere reclamar  de novo que a cociña e os comedores formen parte do servizo público. A alimentación dos nosos nenos e nenas debe ser de proximidade, equilibrada, saudable e por suposto sen traslados que aumentan os riscos de intoxicación.

Camilo Nogueira, Premio Europeo 2019

A Executiva Nacional do BNG congratúlase de que a Fundación Coppieters, vencellada á Alianza Libre Europea, conceda o seu Premio Europeo 2019 ao ex eurodeputado do Bloque, Camilo Nogueira. “É innegable que o recoñecemento a Camilo Nogueira supón unha excelente nova non só para o BNG, senón para toda a sociedade galega”, salienta Ana Miranda, quen en representación da Executiva Nacional do BNG e da Fundación Galiza Sempre acompaña a Nogueira na recollida do premio, que se celebra esta tarde na capital europea

A portavoz nacional, Ana Pontón, como o BNG a través das súas redes sociais, parabenizou ao ex eurodeputado nacionalista por este galardón, “un premio merecidísimo polo seu incansable traballo a favor de Galiza, do seu dereito a existir como nación libre e soberana no mundo, pola defensa que sempre fixo dos sinais de identidade deste pobo e por poñer o seu talento e coraxe político a favor dun futuro mellor para os galegos e as galegas”, subliñou a líder do Bloque.

Con esta distinción, o Centre Maurits Coppieters quere agradecer o traballo de Camilo Nogueira pola autodeterminación dos Pobos, pola democracia, o internacionalismo e a paz. “Estou moi contento de que me fagan entrega deste premio. Para min ten moita importancia persoal porque non deixo de estar nunha entidade singular no mundo enteiro”, manifesta o histórico dirixente do nacionalismo, quen subliña que na Unión Europea “non é posible a pena de morte e por outro lado pode ser un apoio fundamental para cambiar o futuro”.

 

Longa traxectoria

O político galego critica que neste momento se produza a circunstancia de que no Estado español ponse en cuestión o dereito a de autodeterminación. “É unha cousa curiosa porque incluso no referido a Cataluña parece estar prohibido tratar este tema nunha reunión”, sinala ao respecto, salientando que Galiza é “unha nación no mundo” e que este asunto foi xa tratado no Parlamento galego a través de diversas iniciativas que el mesmo impulsou. Nogueira foi deputado na Cámara galega nas lexislaturas 1981-85, 1985-89, 1989-93 e no período 1997-99 até que foi eurodeputado, de 1999 a 2004.

Precisamente desde o Parlamento europeo, propiciou a participación galega no Foro Social Mundial e na Rede Mundial polos Dereitos Colectivos dos Pobos en defensa da autodeterminación. Presidiu ademais o Intergrupo de nacións sen estado, defendeu o pleno recoñecemento da diversidade lingüística da UE e o fortalecemento de relacións entre Galiza e Portugal.

Pola súa banda, a Fundación Coppieters, que toma o seu nome do político flamenco Maurits Coppieters impulsor da creación da Alianza Libre Europea (ALE), promove a investigación sobre políticas a nivel europeo e internacional, centrando as súas prioridades na diversidade cultural e lingüística, a autodeterminación, os dereitos humanos e a promoción da paz.

1 2 3 8